Нега иситиш тизими газ таъминотидан узилган?
Сўнгги йилларда аҳолининг кўп қаватли уйларга бўлган эҳтиёжи ошиб бормоқда. Пировард бу йўналишда қурилиш ишлари ҳам жадаллашиб бормоқда. Хусусан, Қамаши туманида кўп қаватли турар-жой қурилишига катта эътибор қаратилмоқда. Бугунги кунда туманда 37 та кўп қаватли уйларда аҳоли истиқомат қилади.
Кўп қаватли уйларда аҳоли учун қулай шароит яратиш мақсадида режали тадбирлар амалга ошириб келинмоқда. Хусусан, янги бунёд қилинган 4 қаватли турар-жойлар табиий газ, сув, иситиш тизими, канализация, болалар майдончаси ва бошқа қулайликлар билан таъминланган.
Янги турар-жойларда “Тўмарис” ширкати фаолият юритаяпти. Ушбу ширкат фаолияти билан боғлиқ масала юзасидан ижтимоий тармоқларда шу хонадонда яшовчи фуқаронинг видео мурожаати тарқалди. Бу эса ижтимоий тармоқ фойдаланувчиларининг муҳокамасига сабаб бўлди.
Унда хонадонларни исиқлик билан таъминлаш учун мўлжалланган иситиш қозони ишламаётганлиги айтилади.
Ушбу ҳолатга аниқлик киритиш мақсадида ширкат ходимлари, туман газ таъминоти бўлими ходимлари билан кўп қаватли уйда бўлдик.
-Исиққлик билан таъминлаш учун умумий қозон ишлайди, – дейди Қамаши туман газ таъминоти бўлими ходими Турғун Жовлиев. Умумий газ ҳисоблагич кўп қаватли уйларда яшовчи фуқароларнинг 4 миллион сўмга яқин қарздорлиги борлигини кўрсатмоқда. Биз бу бўйича фуқароларни огоҳлантирганмиз. Шунга қарамай ушбу қарздорлик бартараф қилинмади ва бугунги кунда иситиш қозони қарздорлик сабаб табиий газ таъминотидан узилган. Истеъмолчилар қарздорликни бартараф қилиб, олдиндан 30 фоизлик тўловни амалга оширса, иситиш қозони газ билан таъминланади.
Кўп қаватли турар-жойда истиқомат қилувчи аҳоли иситиш тизими учун пул йиғиштириш ишлар бошланганлигини лекин, ҳамма ҳам ушбу тўловларни бажармаганлигини айтишди.
-Туман газ таъминоти бўлими ширкат билан шартнома тузган, – дейди “Тўмарис” ширкат раҳбари Шуҳрат Тиловов. Бугунги кунда иситиш қозонида қарздорлик сабаб газ таъминоти тўхтатилган. Турар-жойда яшовчи 3 та хонадон эгалари томонидан берилган тўловлар туман газ таъминотига ўтказиб берилди. Мурожаат қилган фуқаронинг ўзи ҳам тўловларни амалга оширмасдан келмоқда. Қишнинг совуқ кунларида иситиш тизимидан фойдаланган аҳолининг кунлар исиши билан тўловларни амалга оширишни пайсалга солиши ачинарли ҳолат деб биламан.
Хулоса шуки, иситиш тизимидаги газ таъминоти чекланишларига аҳолининг фойдаланган табиий газ учун тўловларни вақтида амалга оширмасдан келаётганлигини сабаб бўлмоқда.
